Tomana tale na NJV na nona vakadidike

E ratou marautaka na Namosi Joint Venture na nona sa mai tosoya tale na matanitu na nodratou laiseni ni vakadidike
(SPL) me lima tale na yabaki, na laiseni oqo me na qai cava ena 31 ni Maji ena yabaki 2020.

E vakaraitaka na Manidia Liu ni kabani ko Greg Morris ni tosoi ni laiseni oqo ena solia tale vei NJV na galala me tosoy na nona Enviroment & Social Impact Assestment (ESIA) se vakadidike mai Waisoi, ka tosoya talega na na nona
vakadidike ena veivanua ena SPL 1420, ka tomana talega na nodratou veivuke ena vei korokoro eso.

E kuria ka kaya “ Ni kena vakavoui na laiseni, e sala muria kina na Matanitu e dua nai tuvatuva vakacakacaka matata me vakadeuca ka vakadikeva kina vakavinaka na veitikna eso” “Keitou vakavinakavinaka vakalevu vua na marama Minisita
ni Qele kei na Yaubula, vei ira taucoko na vakailesilesi ni Minisitiri kei na Tabana ni Yaubula, vakabibi vei ira na taukei ni qele kei ira na lewe ni vanua ena nodra veitokonitaka na vakavoui ni laseni ni vakadidike”.

E vakadreta ko Mr Morris ni cakacaka e caka tiko mai Namosi, e okati ga kina na qivaqiva me vakadikevi na yaubula ena
loma ni qele kei na vei vakadidike tale eso, , ka sega ni caka tiko na keli vatu talei. Ena kena maroroi kei na taqomaki ni veika bula wavoliti keda e tiki tu ni veiqaravi ni NJV.

E kaya ko Mr Morris “Na cakacaka mai Waisoi, e sa tiko oqo ena vakatagedegede ga ni vakadidike, ka keitou sa cakacaka
sara tiko vaka-kaukauwa na NJV ena kena vakayacori na Environment and Social Impact Assestment, ia ka se sega
ni dua na veivakadeitaki e se caka ena kena tekivu na cakacaka levu ni kelikeli”.

Na gauna e sana vakayacori taucoko kina na vakadidike vakamatailalai eso, e sa na qai sokomuni na kena i tukutuku
taucoko ka soliyani vua na matanitu me vakatulewa kina.

Ia na revote ni Enviroment and Social Impact Assestment (ESIA), ena vakaraitaka na revurevu ni cakacaka e Waisoi kei
na veivakatorocaketaki ena kauta mai me vukea na matanitu ena kena vakatulewataki se rawa ni na vakayacori vinaka na
cakacaka oqo se sega.

Ia e veivakadeitaka tale tikoga ko Mr Morris ni NJV ena kuria tikoga na nona raica vakabibi na kena taqomaki na veika e wavoliti keda kei na nona cakacaka vata kei ira na lewe ni vanua, “Na neitou veimaliwai kei ira na taukei ni qele kei na lewe ni vanua, e dua na tikina bibi ni neitou cakacaka ka ena tomana tiko na NJV na cakacakca oqo – keitou tu dei ena yavu, koya, me cakacakca vata na NJV kei ira na lewe ni vanua, ka mena dau vakasavui talega vei-ira nai tuvatuva ni neitou cakacaka”, e kaya ko Mr Morris.