Sainitaki na veidinadinati ni Veitokoni

E tiki ni nodrau cakacaka-vata kei na Tikina Namosi Landowners Committee (TNLC), e na solia tiko na kabani na Namosi Joint Venture (NJV) na nona veivuke e na vakaduri ni vale-ni-volavola ni TNLC me rawa ni qarava vinaka kina na nona i tavi.

A mai vakadeitaki na veiwekani oqo e na kena sainitaki e dua na veidinadinati vakalawa se `Cost Support Deed’ mai vei Greg Morris na Manidia liu ni Kabani e Viti kei ratou na veiliutaki e na TNLC.

E na ruku ni veidinadinati o ya, e na sauma na NJV na vakaduri ni vale-ni-volavola kei na kena vakaiyayataki e na computer, talevoni, photocopier, teveli kei na idabedabe, ka na sauma talega na NJV na bili ni talevoni, livaliva, fax kei na `internet’.

E na sauma vaka-kina na NJV na kedrau i sau e rua na vakailesilesi me qarava na vale-ni-volavola, o ya e dua na vunivola kei na draiva.

E na veivuke vaka-kina na NJV, me vukea na matanitu e na voli ni dua na 4WD me vakayagataka va-tabakidua na TNLC e na nona veiqaravi.

“Na kena mai sainitaki na veidinadinati qo, sa taracake tikoga na veiwekani kei na TNLC,” kaya o Greg Morris na Manidia Liu ni Kabani e Viti.

“E marautaka na NJV me veivuke e na tikina oqo ka na vukea na cakacaka se veiqaravi ni TNLC, me qaravi sara vaka-vinaka.”

“E dei tu na kabani e na nona taracake ka vaqaqacotaka na veiwekani ka sa tabaka oti na kena veiyalayalati kei na matanitu, na TNLC kei na NJV,” kaya o Morris.

Na sainitaki ni veidinadinati vakalawa o ya se “Cost Support Deed”, a vakadinadinataka ka veitokoni kina o Kanala Apakuki Kurusiga na i Vukevuke ni Vunivola Tudei e na Tabacakacaka iTaukei.