Tomana na dauteitei mai Namosi na volitaki vuani qele kina kabani na Namosi Joint Venture

Era sa tomana na dau teitei mai na Tikina ko Namosi ena vanua vakaturaga ko Nabukebuke na kena vakauti na vua ni qele kina keba ni kabani ni vakadidike ni vatu talei e Waisoi na Namosi Joint Venture (NJV).

Esa oti qo e sivia ni dua na yabaki era qai tomana tale qo na dauteitei ena loma ni tikina ko Namosi na nodra vakania na kabani ena vua ni qele.

E mai tekivutaki tale na kena vakarautaki ka volitaki na vua ni qele mai na koro ko Namosi ena macawa sa oti.

Eratou a vakadinadinataka na kena tekivutaki tale na veivoli oqo na komiti ni taukei ni qele e Namosi na Namosi Tikina Landowners Committee, na vakailesilesi ni kabani, ea mata taka yani na matanitu na Roko Tui Namosi kei ira na vakailesilesi mai na tabana ni teitei.

Ea volia kina na kabani e rauta ni 107 na kilo na dalo kei na 135 na kilo na tavioka, ka namaki me na tubu cake na mata ni fika oqori ena gauna esa na vakacagau kina na cakacaka e Waisoi.

E kaya o Lasaro Dau ka mata taki ira tiko mai na dauteitei ni vakavinavinaka taka vakalevu na NJV ena vakatulewa e mai vakatauci me tomana tale na kena veivoli vei ira na dau teitei e Namosi – ka sa rawa me vakavure i lavo vei ira.

E rau digitaka vakamatau o Maria Samuels ka qarava tiko na kena cicivaki na vale ni kana ena keba mai Waisoi kei Ben Hastings ka taura vakatawa tiko na kena liutaki na cakacaka mai na keba na kakana dina e mai voli oqo ka dua talega na tikina e vakaraitaka o Hastings na nona taleitaka nai kanakana ni vakalavalava.

Tukuna na liuliu ni kabani se NJV Country Manager o Greg Morris ni ratou sa vakanamata ena kena vakarabailevutaki na qaravi bisinisi kei ira na lewenivanua.